Jedan, dva, tri…deset – i još vavek zvoni

Jedan, dva, tri… deset. I još vavek se čuje kako zvoni. Va mićoj radionice Žejanca Antona Stambulića – Tončića ki biva pul Jušić, a zvonci dela sada već četrdeset i tri leta. O puste kot da se je vreme fermalo – leh Tončićev batić se čuje kako buva i buva po lamarine, zadnjeh let o puste takoreć od škurega do škurega, aš se je više zvončari (pa i zvočarskih trup) ki bi oteli da jin vredni majstor stori dobar komplet zvonci. Va oven kraje ni zvočarske trupe koj ih ni storil, a njegovi zvonci finili su i va Austriju i Nemačku.

Nikad ni zvonci oprtil
– Judi h mane sami pridu, ja nikad nisan nikega zval. To je tako valjda kad umeš neč storit kako rabi. Ma mane to ni niš teško, aš volin te naše stare užance, a pogotovo zvončare ke san vavek volel gledat ako umeju dobro zvonit mada sam nisan nikad zvonci oprtil. Malo nas je još takoveh, ma nas je, rekal je dobri Tončić. Onako mić i suh da bi čovek skoro rekal da je i batić veći od njega, vavek je bil priložan semu, a zvonci je počel delat, kako će reć, kad mu je fantina rekal da oteje bit zvončar.

– Žena mi je rekla “pa dobro Tončić, ča si ti tako bedast da ne umeš jeni zvonci storit” nakon ča smo jedan dan pred pust po celen oven kraje iskali čoveka ki bi nan dal zvonci za sina ki je onda imel četira leta. Na kraje smo prišli na Mune i tamo su nan rekli da nan moru dat zvonci leh ko otejemo da nan ih s krave znamu, i tako san se ja ćapal dela. Pa su onda prišli drugi zvončari, aš da su čuli da ja delan zvonci pa ako ću njin ih storit, i tako je se počelo, domišlja se Tončić, ki je zvonci počel delat još 1967. leta i od onda je jedini va oven kraje ki se s ten bavi.

– Danas si oteju imet svoje zvonce, a više je zvončarskeh grup nego ča ih je bilo recimo pred 50 let. Ja kad vidin neki zvonac, zajno ću van reć ako san ga ja storil, i to po vare, zato aš niki ne dela tako – ja zvonac varin z elektrodu i onda ga zavarin va jenen poteze od vrha do dna, rekal je Tončić. Mada je već odavno zapisan va zvončarske i pusne anale ovega kraja, komać pasano leto od Općine Matuji dobil je nagradu za svoj veli doprinos zvončarskoj tradiciji. Moremo reć da skoro i malo kasno, ma bolje i sad nego nikad.

Kategorija: Zanimljivosti |